Post
17/07/2015 - Lulio 2015
Lulio 2015
Cari amissimondoveneto,
amissimissionariveneti
e amissi die amissi sparsi in tute le vie del mondo:
C I A O ! Come steo? Come la
va? Cossa feo?
Co tanto ritardo nel spedirve questa niuss,
ma co tante cose da contarve
che no savaría da che parte scuminsiare
sercaró de darve calche notissia che gavará pí ´l vaeore de un
saeúdo
che no te un… telegiornale!
* Intanto e prima de tuto,
un grassie coeoroso,
come a temperatura de sti dí dae nostre parti….
par tuti i amissi de 4 continenti che ga parteciá
áea SERATA
MONDIAE DE LETURA del 20 de Giugno scorso!
Qué emossión sentirse vissini atraverso un schermo
anca quando se gera tanto distanti, stacai de miliari de
kiómetri!!!
Speremo de ripétare presto sta esperienza, magari atressái mejio
e co tanti pí amissi che partecipará!
Siiiiiiiiiiiiiiiiiiiiiiii!!!
** Nantra bea manifestassión,
a zé sta la premiassión
guidá co esperta maestría dal Prof. Luigi Cesaroni
nea cornise straordinaria de un beíssimo paeasso de Treviso,
la CASA DEI CARRARESI,
bagná dae fresche aque del fiume SIL, caro anca a DANTE!
Un sincero grassie va anca a un “semplice invitá”, Franco Baggio dei
Battistei de Cittadella riussendo a fare un vero capolavoro che se pol védare
in questo link:
Ricordemo anca che zé sta agiorná la messa a disposissión
dei Boetini de Poesia El
Sil dal 2013 al 2015
*** E visto che ghe semo in tema
de poesia…
che tuti i pensieri
porta via…
Amissimondoveneto ga aderío ben voentieri e co tuto ´l core,
áea 20^ edissión del Premio de Poesia PAOLA MUNARO de Lama Polesine – Rovigo,
dal tema luminoso: “Vivere nella luce. Fiat lux: dall’afflato
divino alla quotidianità”
e che podí védare el Bando so questa pagina QUA:
Bando semplice,
fássie e essensiae! Mérita de partecipare!!!
**** LAURA DA RE, na cara
amigamondoveneto, poliedrica artista dal´ánema naif zé mancá improvvisamente
nea so casa de Coneján al 30 de Giugno assando in ereditá tra tantissimi altri
libri, “Il ritorno di
Tombolino, l´uomo bambino” che forse ga fato ora védare e ciapare in brasso la so ultima
creatura…
Inte
a a so pagina del nostro Sito ghezé i últimi aggiornamenti!!!
***** ALFREDO VÍTULO – Cavarzerán –
in provincia de Venessia,
anca se tanto impegná nonostante e so otanta barete áea Academia
de pitura del so paese, Sint Niklaas in Belgio ´l manda un saeudín a tuti co
ste poche paroe in verso:
|
|
|
Ciao Roberto,
Grassie dea to risposta.
Cossa voto, Roberto,
ea vita xe ‘na guera,
pochi a comandare,
tanti a sfadigare.
I siuri, che senpre pi’ schei voria
se li podesse, l’aria vendaria
e ai poareti on toco de pan ghe
daria
parchè la zente, par luri, xe
marcansia.
Ma, in fin dei conti,
noantri picoi semo fortunà
parchè se semo furbi,
ghemo tanta libertà.
Lezi
ea me picola poesia.
EL
DIRETORE
I altri fasèa cariera
e mi gera senpre in preghiera
par sostegnere el morae
parchè no la finisse mae.
Me so stufà de pregare,
me so messo come tuti a reclamare
e, desso ca so diretore,
no prego pi’ el Signore.
Ma soia deventà pi’ contento?
Me lo domando in sto momento
e me digo, sensa pérdare ea rima
ca gero pi’ contento prima.
Alfredo Vítulo – Sint Niklaas –
Belgio
******** Par no
far torto a nessún dei poeti premiái al SIL ve ricordemo el maravejoso filmato
de Franco Baggio, dové podarí apressare ogni momento dea cerimonia
e ogni poesia dei
premiái.
Co´n abrasso e un strucón
par sentirse pí vanti co le vostre informassión!
Roberto, amissimondoveneto
Nessun commento:
Posta un commento