Post
|
|
|
Cuviertine 
Cronachis
Vençon
Venzonevo, une plombe te ete di mieç
Sabide ai 25 di Otubar, aes 14.30 presentazion dai grups storics e animadôrs. Vierzidure dai ponts di ristôr de associazion imprenditôr comerciants di Vençon: cort dal palaç Orgnani Martina, Taverne Gattolini della Pro Venzone. Vierzidure dal marcjât dai mistîrs antîcs e dai lavôrs fat a man cun dimostrazion pratiche dal propi inzegn creatîf. Piçul marcjât dai prodots di mangjâ. Mostre dai liûts. Aes 15.3O: spetacui ator pal borc fin aes 22: musicants, danzis tra damis e cjavalîrs, gaugars, duelants, danzadoris dal vintri, sbandieradôrs e tambûrs. Cjanton des torturis e zûcs storics. Feminis che a train lis cjartis. Notis di arpe tre loze dal Municipi. Aes 15.30 e aes 17 spetacul par cure di ANA’-TheMA Teatro Aes 23.OO: Sieradure dai ponts di ristôr. 
Domenie ai 26 di Otubar al tache il grant spetacul de Ete di Mieç. La inmagante atmosfere dal centri storic e vegnarà animade fin aes 19 di musicants, danzis tra damis e cjavalîrs, gaugars, duelants, danzadoris dal vintri, sbandieradôrs e tambûrs. Spetacui ator pal paîs.
Vierzidure dal marcjât dai mistîrs antîcs e dai lavôrs fat a man cun dimostrazion pratiche dal propi inzegn creatîf. Piçul marcjât dai prodots di mangjâ. Mostre dai liûts. Vierzidure dai ponts di ristôr. Aes 14.30 Passaç dal corteu storic dilun vie li stradis dal centri. Aes 17, teatri di strade. I “cence mascare” a presenti “La note dal Banc”.Si siere aes 20.
Morùs
Becins pâr chei che si pein ae Bande largje
La aministrazion Comunâl di Morùs e continue a ritignî dovût jessi come part ative intal superament dal Digjitâl Divide che al interesse i abitants dal nestri teritori in maniere significative.
Passâ il Digjitâl Divide par altri nol significhe dome meti ducj in stât di acedi a internet ma ancje di doprâlu in maniere corete, promovint la cognossince di chest impuartant strument vuê che lis aziendis e la aministrazion publiche a scomencin a erogâ i lôr servizis ancje in linie. Une prospetive, cheste, che e à des pleis sociâls e economichis, dal moment che al dì di vuê savê doprâ un Pc e la rêt al ven domandât cuasi in ducj i lûcs di lavôr. Par chest motîf o vin decidût di stanziâ un fonts metint a disposizion di fameis e singui un bonus di 100€ par chei che a sotscrivaran (o a àn sotscrit za tacant dal 1 di Zenâr dal 2014) un abonament pe conession a Internet in Bande Largje. Lis carateristichis par presentâ la domande, dentri di e no di là dai 21 Di Novembar, a son la residence intal Comun e il possès de Cjarte Famee o un ISEE dentri dai 30.000€ pai singui. Une ocasion ancje pai operadôrs che a ufrissin contrats di navigazion in internet di miorâ la cuviertidure dai servizis sul teritori e di fâ cognossi lis lôr ufiertis ai citadins. Par dutis lis informazions sul bant o sui operadôrs che o furnìs il servizi, visitâ il sît www.comune.moruzzo.ud.it o contatâ l' ufici Assistence dal Comun di Morùs. Enrico Di Stefano - Assessôr ae Inovazion e ai Servizis Teritoriâi
LUMIGNA'
I premiâts dal concors di piture “Antonio Coceani”
Cul patrocini dal Comun di Pavie di Udin e de Provincie di Udin, sabide ai 11 di Otubar si è davuelte a Lumignà e Curtiel di Pavie la 44te mostra-concors ex tempore di piture «Antonio Coceani”». LA iniziative, organizade de associazion Call (Comitât Ativitâts Locâls Lumignà) si è davuelte intune uniche zornade, che dilunc di chê i partecipants a àn timbrât lis telis, curât la esecuzion des oparis movintsi in libertât sul teritori comunâl e infin consegnât i cuadris finîts par sometiju al esam de jurie e duncje esponiju ae libare vision dal public inte curnîs splendide di vile Caiselli a Curtiel, metude a disposizion dal cav. Mario Carlutti.
I cuindis concorints, doi in plui a pet de edizion passade, a àn lavorât tant ben, presentant ancjetantis oparis di nivel otim, che intal dopomisdì sul tart a son stadis valutadis de jurie, componude de storiche de art Rafaella Loffreda, dal pitôr Nilo Cabai e dal storic Gabriele Caiazza, coadiuvâts dal rapresentant dal CALL Natale Parisi. Ae fin, il prin premi – ufiert dal Comun di Pavie – al è lât ae opare de pitore Carla Bastianutti «pe armonie compositive e la frescjece dai colôrs di un “discors” naratîf che al pant la capacitât di interpretâ il teritori cuntun lengaç figuratîf no scontât». Il secont premi, ufiert dal Circul Fe.Na.L.C di Lumignà e de Associazion Call, al è stât assegnât ae opare de pitore Beatrice Cepellotti «pe delicatece dal lengaç segnic, pe capacitât di unî la imediatece dal segn ae fuarce de cromie e pe teniche esecutive dal at “evocatîf” di timps pierdûts». Il tierç premi, metût in pali de dite M.M. srl di Lumignà, al è lât infin ae opare dal pitôr Luigi Busi, «pal implant compositîf e la plasinte monocromie, che al rimande a tocs pitorics e fotografics antîcs pierdûts dal timp ma presints inte memorie coletive». A completament des premiazions, a son stadis assegnadis pûr trê targhis – ufiertis de Fondiarie- Sai di Udin, de A.S.D. di Lumignà e de Associazion CALL – par ancjetantis segnalazions aes oparis dai artiscj Dorino Borin, «pe frescjece gjestuâl e l'ecuilibrât cromatisim», Maria Del Zotto, «pe capacitât poetiche di tradusi la realtât intune solitudin personâl», e Beppino Tosolini, «pal impat coloristic vivarôs e la riessude tecniche esecutive».
associazionecall.blogspot.it
CJARLINS
Laboratori di autonomie, prime jessude
La sale de ex latarie, trasformade in sale consiliâr, joibe ai 16 di Otubare à ospitât cuntun plenon la prime "lezion" dal "Laboratori di autonomie" organizât di dodis sindics furlans, intune cun La Grame, Glesie furlane, Onde Furlane, La Patrie dal Friûl e la colaborazion dal MuMuCEI de Universitât di Udin.
Ma no si è tratât di une lezion, cemût che al à volût precisâ intal so salût il sindic di Cjarlins, Diego Navarria: «No si trate- al à dit il prin citadin- di insegnâ nuie a nissun, ma di cimentâ traviers un fuart e viert confront, chel spirt identitari che al à permetût chescj incuintris e che al viôt vuê lis nestris comunitâts interogâsi sul lôr stes futûr e plui in gjenerâl su chel dal Friûl» Ator de taule intune cul moderadôr Giorgio Cavallo, i sindics di Cinto, Gianluca Falcomer, chel di Merêt di Tombe, Massimo Moretuzzo, di Muçane, Cristian Sedran, l'assessôr de Provincie di Pordenon, Stefano Zannier, e l'ex sindic di Migjee, Alberto Bergamini. Fin des primis peraulis al aparìs clâr chel che al sarà il fîl condutôr di chescj laboratoris: la crisi e esist, a servissin rispuestis, ma chestis no puedin e no àn di passâ parsore dal cjâf dai citadins, pene une altre colade de democrazie, za metude in discussion fuarte de mancjance di fiducie intai partîts e intes istituzions. Une considerazion e vâl par ducj: «Il Comun, e massime il sindic, al reste forsit la uniche entitât che e manten un rapuart fiduciari tra eletôr e elet, pierdi ancje chest al significarès dâ un colp definitîf ae idee stesse di rapresentance» Il pericul al devente concret se la riforme dai ents locâi, presentade de Regjon, si propon cun formulis e struturis agregativis caladis dal alt e che, invezit di semplificâ la burocrazie, calâ lis spesis e razionalizâ, a crein i supuescj di gnûfs ents cjârs, lontans des esigjencis dai citadins. Che al coventi torna a sestâ il telâristituzionâl de Regjon, viodude ancje la cancelazion des Provinciis, al è clâr a ducj. Cemût che dal rest, a afermin i sindics, e covente la condivision dai servizis, no plui sostignibii des aministrazions singulis, ma la rispueste no pues jessi "tecniciste". Nol baste "un ufici tecnic cun 50 personis tal puest di 3" se dopo la rispueste al citadin no corispuint ai siei bisugns e esigjencis. Il discors si slargje aes partecipadis. Il probleme lu met il sindic di Flumisel, Scridel, intant che Sedran si ferme su la dibisugne di formis ancje alternativis che la societât furlane vuê si da sul teritori, cu la riscuvierte dai ûs civics, di chel ben comun che in fonts al rapresente la vere mole che e unifiche chescj incuintris. Unanim la dibisugne di lâ indenant intal confront, cu la pussibilitât di agregâ altris comuns suntune plateforme di discussion buine di conversâ cu la Regjon, tornant a afermâ la esistence de identitât furlane e dal so declinâsi suntun teritori extra provinciâl. Prossims apontaments dal "Laboratori" joibe ai 23 di Otubar al centri sociâl Flaiban (su lenghe e culture) e joibe ai 30 di Otubar a Rivis d’Arcjan (su la comunicazion).
TOR DI ZUIN
La realtât produtive dai agns '50 intai plastics de SNIA
Dai 19 di Otubar a saran viertis aes visitis dal grant public, pe prime volte, lis ricostruzions des struturis industriâls de SNIA Viscosa conservadis al Centri Informazion Documentazion (Cid) di Tor di Zuin. Si trate di 27 plastics di dimensions impuartantis (di 4 a 10 m² ognidun) che a riprodusin i implants che la SNIA e veve in dute la Italie e tal forest inte seconde metât dai agns Cincuante. A son stâts comissionâts de stesse SNIA e colocâts inte sede preseabile dal Cid, edifici di rapresentance ae epoche a pene tirât sù, là che si acetavin lis delegazions des aziendis forestis che a vignivin a visitâ i implants di chê plui impuartant industrie tessile taliane.
 Intal so insiemi, la colezion e ilustre in mût sempliç e imediât la storie straordenarie dal manifaturîr talian cun rivuart particolâr al setôr dai tessii artificiâi. Grande part dai plastics e rivuarde i implants industriâi dal Nord: Piemont (Altessano, Venaria Reale, Turin), Lombardie (Cesano Maderno, Ceriano Laghetto, Voghera, Pavia, Magenta, Varedo), Venit (Padue, Vittorio Veneto, Este), Friûl Vignesie Julie (Tarcint, Pordenon, Triest, Segrât, Midun, Tor di Zuin). Diviers a rapresentin la realtât industriâl dal centri Sud (Rieti, Napoli) e altris chê dai implants dislocâts tal forest (Messic, Sud Afriche, Indie, ex Union Sovietiche).I plastics e il stes Cid a son stâts ogjet di un lavôr resint di restaur e di ristruturazion, in graciis di un contribût european concedût al Comun di Tor di Zuin par un progjet dedicât ae archeologjie industriâl. Intai ultins trente agns il Cid di fat nol jere stât sometût a nissun intervent di manutenzion e chest al veve comprometût part dal edifici e soredut i materiâi in chel contignûts, cualchidun di valôr culturâl e economic impuartant. Tra chei altris, il Cid conserve une des struturis cinetichis famosis di Enzo Mari, creade dal artist di pueste par cheste sede su comission de SNIA, in chei agns tant atente ancje a chescj aspiets di imagjin. La viertidure al public de part dal plan intierât dal Cid che al conserve i plastics e je in program pes oris 10.30 di domenie ai 19 di Otubar. Si vise infin che a son viertis fin al fin di Otubar (sabide e domenie, oris 10 - 20) lis dôs mostris "La bataie dal gran, autarchie, bonifichis, citâts gnovis" e "Arkady Shaikhet, un mestri de fotografie russe dai agns Vincj e Trente" dedicadis in maniere rispetive ai agns Trente inte Italie fassiste e in Union Sovietiche. Altris informazions sul sît web dal Comun di Tor di Zuin www.comune.torviscosa.ud.it.
SPILIMBERC
Ator par Spilimberc e pes muculis
L’Aministrazion Comunâl e à il plasê di invidâ a la presentazion dal percors di interes ambientalistic e storic “Ator par Spilimberc e par lis muculis 3”, sabide 18 di Otubar 2014. In gracie de disponibilitât de Associazion Gradiscje, de Corâl Spengenberg e de ASD Polisportive Trivium e ven inaugurade la tierce e ultime part dal percors ciclopedonâl Ator par Spilimberc e par lis muculis. La manifestazion e proviôt la inaugurazion dal restaur de postazion militâr metude a difese dal puint tra Gradiscje e Bunzic in timp de prime vuere mondiâl. Restaurade a opare di Franco Rota, e je dedicade al soldât di Poggibonsi (SI) Alfredo Calzolari Morelli muart lì, il 4 di Novembar dal 1917 intant de ritirade di Cjaurêt. Podopo, la vierte de mostre Imagjinis e cimelis tra Gradiscje e Bunzic inte Grande Vuere organizade de Associazion Gradiscje.
A ducj i partecipants e vignarà consegnade une copie de mape cun dut il percors
Program. Oris 15: incuintri in Place Domo. Pedalade intal ambit de manifestazion SportinCittà, in colaborazion cun ASD Polisportive Trivium - Oris 16.30: si rive a Gradiscje ae postazion militâr
Oris 16.45: Inaugurazion dal restaur de postazion militâr. Posizionament de targhe a memorie dal soldât Calzolari Morelli. Benedizion dal sît cun intervent de Corâl Spengenberg. - Po dopo, al Cubo di Gradiscje Inaugurazion de mostre: Imagjinis e cimelis tra Gradiscje e Bunzic inte Grande Vuere. Introduzion ae esposizion a cure di Franco Rota e Daniele Bisaro. Ghiringhel par cure de Associazion Gradiscje - Oris17.45: si torne a Spilimberc
Intant dal percors e je garantide la presince de Polizie Municipâl. In câs di brut timp la pedalade e ven anulade. La mostre Imagjinis e cimelis tra Gradiscje e Bunzic inte Grande Vuere e sarà vierte al public ancje domenie 19 di Otubar cun orari continuât 9-18.
CJARLINS
Sieraments gnûfs e implant fotovoltaic te scuele di infanzie
A son stâts identificâts i imobii comunâi che plui a àn bisugne di une ricualificazion energjetiche e chei plui adats ae instalazion di implants a fonts energjetichis rinovabilis, valutant soluzions che a fossin in stât di meti adun miorament e eficience cul disvilup des fonts rinovabilis. La prioritât e je stade dade al edifici de scuele de infanzie, che al sarà interessât di lavôrs di miorament dai aspiets energjetics complessîfs traviers la sostituzion dai sieraments e la realizazion di un implant fotovoltaic sul cuviert. La spese e je di 100mil euros (80mil di contribût regjonâl e 20mil cun fonts comunâi).
“Eficience energjetiche, contigniment dai consums, produzion di energjie di fonts rinovabilis – al declare il sindic Diego Navarria - a son lis problematichis che la Aministrazion si è impegnade a frontâ pal mandât 2014-19 rivuart ae energjie; cun chest intervent o rivìn a un prin e obietîf significatîf”.
L'intervent di sostituzion dai sieraments e previôt di meti al puest di chei esistents gnûfs sieraments in alumini a tai termic contrassegnâts di une rese energjetiche otimâl cun carateristichis termichis superiôr a cetant domandât des normativis in materie di sparagn energjetic. Si previôt ancje di doprâ, su la bande Sudovest dal fabricât, la aplicazion di veris seletîfs che, di là di al isolament termic dilunc de stagjon frede, a sigurin une protezion dal calôr esterni dilunc dal periodi estîf lassant però passâ une alçade cuantitât di lûs naturâl.
L'implant fotovoltaic, che al vignarà fat su la cuviertidure dal edifici, al varà une potence di 6 wp, une superficie di plui o mancul 32 m² e al sarà componût di une ventine di panei di prime cualitât, cuntune alçade eficience cjapade dentri in maniere indicative tra il 17 e il 20%. Chest implant al permetarà di fâ in sostance autonom l'edifici dal pont di viste dai consums energjetics e la spese sostignude dal Comun e sarà amortizade intal arc di pôcs agns. Al sarà ancje pussibil previodi, in futûr, un ûs otimâl de energjie prodote doprant cusinis a induzion o aparâts a pompe di calôr pal riscjaldament. La spese e je sui 16mil euros.
RUVIGNE
Il museu de Grande vuere al cress
Tantis novitâts a cjapin il Museu de Grande Vuere di Ruvigne, une struture nassude intal 2007 dopo di un progjet european, che al à racuet l'impegn di studiôs e apassionâts locâi e la iniziative de aministrazion comunâl e che vuê al è deventât un pont impuartant di riferiment pes ativitâts leadis ae storie, ae memorie e al turisim culturâl dal Prin Conflit Mondiâl. Di pôcs dîs a son scomençâts i intervents di ampliament de realtât museâl, fats in graciis di un acuardi di colaborazion stipulât tra Comun e Regjon. Il progjet al puartarà ae catalogazion complete dai reperts daûr canui sientifics intune bancje dâts doprabil on line al sît www.grandeguerra-ragogna.it, ae espansion considerevule dai spazis espositîfs e dai supuarts didatics, al restaur dai "grafîts di vuere" presints sul teritori di Ruvigne, in plui che a ativitâts di manutenzion straordenariis dai trois dal parc tematic "I lûcs de Grande Vuere intal Friûl Culinâr" e ae edizion di une vuide informative plurilengâl.
Il Museu e il parc tematic esterni, che al propon plui di 20 km di trois storics, za a contin une afluence impuartante: plui di 7.000 a son i visitadôrs regjistrâts, talians e forescj, des colezions, dai sîts e des iniziativis culturâls organizadis dal Museu, dome intai prins nûf mês dal an. Si stime che, ai 31 di Dicembar, al vignarà sorpassât il soiâr dai 10mil ospits. "Une sodisfazion particolâr - precise Marco Passons, fondadôr dal Museu e assessôr comunâl - e à puartât la visite resinte dai Arlêfs Uficiâi de Academie Nazionâl de Vuardie di Finance, la setemane passade".
Par no dispierdi la rispueste otignude e lis oportunitâts ufiertis dal Centenari, la Associazion di volontariât gjestore dal Museu e intint infin slargjâ i oraris di visite al Museu aes domeniis. Un prin esperiment in chest sens si varà di chest mês di Otubar, là che il Museu al sarà viert ogni domenie des oris 15:30 aes 18:00, plui dai oraris consolidâts dal martars-joibe-sabide des oris 15.30 aes 18.
PRATE
Teatri Pileo: gnove gjestion, gnove stagjon
La rassegne teatrâl 2014-2015 dal Teatri Pileo, organizade dal Diapason Societât Cooperative in colaborazion cul Comun di Prate di Pordenon al è plen di apontaments di alt nivel, artiscj ecelents, classic e contemporani, par ufrî dute la emozion che dome che il teatri dal vîf al sa e al pues dâ.
Tacant dai 26 di Otubar fin ae Vierte dal 2015, i spetatôrs a podaran assisti ai spetacui che a vignaran proponûts inte formule di doi percors: la Stagjon Primarie e il Teatri dai Piçui. I apontaments de rassegne dal 'Teatri dai Piçui' a son simpri di domenie dopomisdì cun principi aes 16. Ai 26 di Otubar si scomence cul spetacul in 'cjar e len' de Compagnie Teatro in Trambusto 'Varietât Prestige', un paiaç elegant in cotulute nus puarte intal so mont di fantasiis retrò, maniis sureâls e siums reâi cun in bande di jê i siei socis di len. Si continue ai 23 di Novembar cun 'Jù lis mans di nono Tomâs' de compagnie Molino Rosenkranz; doi atôrs, imagjins e “pipins” par une storie magjiche e aventurose, che tra lis riis nus conte dal leam che al unìs nonos e nevôts. Domenie ai 8 di Fevrâr sul palc i buratins di Cosmoteatro par 'La Cjamese dal om content', spetacul che al cjape ispirazion di une flabe antighe de tradizion popolâr furlane. La rassegne si siere al 1 di Març cu la Compagnie La Fabbrica delle bucce-arte e spettacolo che e presente 'Il Pessut neri' che si caratarize e e inmaghe pal origjinâl metude in sene là che i pipins si movin 'in maniere misteriose' suntun schermi dulà che al cor il paisaç, creant un efiet magjic e poetic. 
Natalino Balasso, a Prate ai 25 di Març dal 2015
La Stagjon Primarie e scomence invezit miercus ai 19 di Novembar cuntun classic, 'La Mandragola', presentât de Compagnie Progjet URT. Un spetacul vivarôs, che al sclopete, animât di une vis comiche rampide, cuntun cast di atôrs in sintonie otime, ben vuidâts di Jurij Ferrini.
Si continue domenie ai 28 di Dicembar cul apontament dedicât ae magjie. Chest an il 'Gala de Magjie' al sarà presentât dal mago Sirius, sul palc l'incredibil spetacul di Mirco Menegatti, campion talian di magjie, lis grandis ilusions cul duet Luis e lis incredibilis abilitâts di Magic Andree. Sabide ai 24 di Zenâr, al rive in provincie, dopo il dut esaurît a Rome e Milan, pe prime e uniche date in regjon 'Cinque Allegri Ragazzi Morti – Il Musical Lo Fi.' Dal omonim romanic a fumets di Davide Toffolo, che al à ispirât la gjenesi dai Tre Allegri Ragazzi Morti, il grup rock indipendent di Pordenon – la trasposizion teatrâl/musicâl de liende horror-romantiche dai cinc liceâi che, dopo di un incident mortâl procurât di un rituâl voodoo, a deventin zombi condanâts a nudrîsi dome di cjar umane, rinunziâ al amôr e no interferî intes esistencis dai vîfs. In sene l'autôr e musicist Davide Toffolo, che, insiemi a zovins performers, a recitin, a balin e a cjantin lis cjançons famosis dai Tre Allegri Ragazzi Morti. A sierâ la Rassegne Primarie, miercus ai 25 di Març un spetacul di stand up comedian american agns '70, cence sgherlifs. Stand Up Balasso!, di e cun Natalino Balasso che al racuei in chest spetacul tocs, monolics e tiradis comichis dai siei ultins 10 agns sui palcs di dute Italie. Nissun fîl condutôr, nissune storie, ma tante comicitât, si trate di fat di un spetacul dut “di ridi”. Informazion: www.teatropileo.it
Cjavaç
Fuart dal Mont Fieste, une mostre permanente
Domenie ai 28 di Setembar, tacant des 11, li dal plaçâl devant il Municipi di Cjavaç e i locâi de ex latarie, in vie Sant Roc 3, si tignarà la scree de mostre permanente dedicade al Fuart dal Mont Fieste.
La mostre, fate cun fonts europeans pal midiant di Euroleader intal ambit dal Plan di Disvilup Rurâl 2007-2013, e je il risultât de partecipazion dal Comun di Cjavaç a un bant specific che par chel al è stât presentât un progjet pe promozion culturâl, turistiche e didatiche dal Fuart. E je stade preparade cun diviers panei fotografics, videos, furniments e, in particolâr, cuntun program a pueste che al ricostruìs in maniere virtuâl il Fuart dal Mont Fieste e che al permet cussì di fâ un viaç virtuâl dentri.
Chest avigniment al rapresente ancje une ocasion pal comun di Cjavaç di memoreâ il centenari de Grande Vuere e la difese eroiche dal Fuart sucedude intal 1917. Propit par dâ risalt a cheste ricorence impuartante, di là de presentazion dal progjet e de ilustrazion des ativitâts turistichis culturâls a chel colegadis, si tignarà une conference dal prof. Enrico Folisi. Po dopo, cui che lu desiderarà, al podarà puartâsi sul Mont Fieste midiant naviselis fûrstrade metudis a disposizion pe ocasion.
INFO www.comune.cavazzocarnico.ud.it - www.fortemontefesta.it 0433 487400 - 0433 487990
Tumieç
“Imagjins e storiis de societât”, rassegne di cine
E partìs la Rassegne comunâl di Cine di atualitât “Imagjins e storiis de societât”. I apontaments si articolaran su vot seradis a jentrade libare, ogni miercus aes 20.30, tacant di miercus ai 17 di Setembar. Lis proiezions si tignaran inte salute multimediâl dal Museu Carnic “Michele Gortani”. Lis seradis a saran condotis di Annalisa Bonfiglioli, che e curarà introduzion e eventuâl dibatiment. Cun di plui, par cui che al volès, a saran une pagjine Facebook e une Twitter, che traviers chês il public al podarà interagjî in maniere direte, scambiant opinions e propuestis.
La rassegne e nas cu la volontât di coniugâ il plasê dai cines, cun cine di produzion resinte e alte cualitât, cu lis tematichis sociâls plui impuartantis dal dì di vuê. L'obietîf al è, di fat, chel di ufrî des seradis che a puedin jessi sedi di dipuart sedi di riflession e insiorament. La sielte dai cines e je stade fate in maniere partecipade, di fat cierts dai cines segnâts a son stâts cjapâts da conseis mandâts di plui personis midiant un scandai in linie su Facebook. Chest il calendari des proiezions e des problematichis che a vignaran frontadis: ai 17 di Setembar – TE HELP (discriminazion raziâl) ai 24 di Setembar – BROTHERS (consecuencis de vuere) al 1 di Otubar – UNE CJANÇON PAR MARION (tierce etât) ai 8 di Otubar – INSIDE JOB (crisi economiche) ai 15 di Otubar – CHÊ ALTRE METÂT DAL AMÔR (amôr zovins e omosessualitât) ai 22 di Otubar – LA ONDE (sistemis politics autoritaris) ai 29 di Otubar – E CUMÒ DULA' LINO? (conflits religjôs) ai 5 di Novembar – PROMISED LAND (ecologjie)
Info: www.comune.tolmezzo.ud.it - 0433 487961
CIVIDÂT
 Vincj comuns adun par difindi l'ospedâl Ai 15 di Setembar, un sentade comune dai Conseis comunâi Lunis ai 28 di Lui si è tignude, li de sale consiliâr dal municipi di Cividât, une riunion fra vincj aministrazions comunâls dal Ambit distretuâl de zone di Cividât e dal ex Mandament par discuti su la tematiche de riforme sanitarie regjonâl. Clamade dal Sindic di Cividât Stefano Balloch, la riunion e à regjistrât la partecipazion dai sindics di Atimis, Buri, Cuar di Rosacis, Drencje, Faedis, Grimac, Manzan, Muimans, Paulêt, Premariâs, Prepot, Pulfar, Remanzâs, San Zuan dal Nadison, San Lenart, Sant Pieri dai sclavons, Savogne, Stregne e Torean. I argoments di spic tratâts di Balloch e di chei altris sindics a son stâts i problemis che a derivin de riforme sanitarie regjonâl, cun riferiment particolâr ai siei efiets sul presidi ospedalîr di Cividât e aes incidencis su la ufierte sanitarie primarie ae popolazion dal larc teritori rapresentât da regâi comuns al incuintri. “E je stade concuardade une azion comune – al sclarìs Balloch - traviers la clamade di une riunion zontade dai Conseis Comunâi che si tignarà ai 15 di Setembar a Cividât”. La riunion e sarà ospitade inte Glesie di Sant Francesc, metude a disposizion di Mons. Livio Carlino. “Intai dîs che a vegnin o mandarìn ai comuns un scheme di ordin dal dì. In maniere seguitive o cjaparìn ducj i contribûts scrits des variis aministrazions – al sclarìs Balloch - e o scrivarìn il document condividût che al sarà aprovât de assemblee dai conseis comunâi ai 15 di Setembar”. “A son stâts invidâts a partecipâ ae riunion di Setembar ancje i sindics dai comuns di Kobarid, Bovec, Tulmin e Brda, di là di al Prefet di Tulmin – al continue Balloch. Chest par aprofondî la pussibilitât di disvilupâ un progjet di sanitât transfrontaliere di interès ancje pes vicinis comunitâts slovenis. O confermi, di fat, che la nestre ipotesi e je chê di un percors che e puarti l'ospedâl di Cividât a jessi un pont che al dà prestazions sanitariis cualificadis dentri di un progjet di sanitât transfrontaliere”.
SAN PIERI DI CJARGNE
A mons. Tito Solari, Giovanni Canciani e Marta Francescatto la prime edizion dal premi “Baston di San Pieri di Cjargne Al tache cun trê ricognossiments a ancjetantis personalitâts che a son daûr a dâ lustri ae Cjargne la prime edizion dal premi “Baston di Sant Pieri di Cjargne”, ideât de arciconfraternite dal Spiritussant “Pieres vives” di S. Pieri in Cjargne. A vê il manufat artistic di len a saran, dilunc di une cerimonie che si tignarà ai 2 di Avost te Plêf di Sant Pieri di Zui in ocasion de fieste di Sant Pieri in vinculis, Mons. Tito Solari, Giovanni Canciani e Marta Francescatto. A mons. Solari al è stât assegnât il premi parcè che si è distint intal cjamp spirituâl e dedicât, cemût che e dîs la motivazion, “ae glesie cun atenzion particolâr ae difese dai dirits e de dignitât dai popui oprimûts e maltratâts de Americhe Latine, intal spirt plui rampit dal Vanzeli”. A Giovanni Canciani al è stât ricognossût l'impegn particolâr intal cjamp culturâl e artistic par “dute une vite dedicade tal mont de musiche e de culture, mandant cun fervôr particolâr aes zovinis chestis passions e lassant une olme palese intal museu de Mozartina, di lui ideât e fat a Paulâr”. Marta Francescatto si è distinte intal cjamp sociâl e umanitari profondint la sô ativitât, “cussì cidin, dedicantsi aes personis mancul fortunadis de Comunitât Piergiorgio, prime a Udin e dopo a Cjanive di Tumieç”. E je ancjemò vuê une “colone puartante” de sede cjargnele de Comunitât Piergiorgio onlus, il Centri pre Onelio. Un progjet ambiziôs, volût a fuart di chel che al jere l'om carismatic di fede, par dâ rispuestis concretis aes esigjencis des personis disabilis dal Alt Friûl. La Arciconfraternite dal Spiritussant “Pieres vives” di Sant Pieri in Cjargne e je stade creade par promovi une cussience di caritât spirituâl, culturâl e sociâl pal popul di Diu e par dute la comunitât, ma ancje par conservâ e valorizâ la Plêf mari di Sant Pieri di Zui. Il Baston di Sant Pieri, intai intindiments, al vûl jessi propit il simbul di un cjamin intal segn dal Vanzeli e dal progrès spirituâl e civîl de umanitât.
RACOLANE
Domenie ai 6 di Lui – Mont Posàr
Cjaminade storiche in Val Resie sui lûcs de Grande Vuere
Ai 27 e 28 di Otubar dal 1917, e fo la Bataie de Val Resie, li de Mont Posàr. Lis tropis imperiâls de "Edelweiss" a forin a un pas de vitorie strategjiche. No je faserin. Sul cjamp di bataie o viodarìn parcè.
Partence: oris 9:00. Puint sul torent Racolane, a Racolane (Scluse). Coordenadis GPS: 46°24'14"N - 13°19'01"E - dulà che al tache il troi CAI n.632. Parc cualchi centenâr di metris prin (tal pais di Racolane) e uns 300 metris dopo il puint.
ITINERARI: Puint sul Racolane - troi CAI n.632 - troi CAI n.638 - Stalis di Siele
Sagate - Postazions cuintri aeriis talianis - Cjamp di bataie Stalis Sie - Cjamp di bataie Mont Posàr - troi CAI n.631 - si torne al pont di partence - visite al grafît da 9m Bersalîrs a Racolane
DIFICOLTÂT: spassizade alpine cence dificoltâts, al covente un ciert alenament; disnivel totâl: sui 700 metris. A coventin scarpis di trekking. Puartait il gustâ a persac e aghe a volontât.
TIMP DE CJAMINADE: tor 7 oris, cjapadis dentris lis polsis tematichis e il gustâ al persac.
ACOMPAGNADÔR STORIC: dot. Marco Pascoli (espert in lûcs de Grande Vuere ex L.R. FVJ 11/2013).
A gratis.
SUDRI
A torzeon cu lis vacjis Une iniziative origjinâl di Slow Food Friûl par promovi i prodots dal lat e dai siei derivâts: si acompagnaran lis vacjis de famee Gortani ae malghe Pozof sul Çoncolan. E je pronte a partî la “caravane” de Transumance Day 2014, un avigniment che Slow Food Friûl al à in program par sabide ai 21 di Jugn, tacant des 9.30. La zornade e sarà organizade cussì: il prin grup che al fasarà la rive sù ae malghe acompagnant lis vacjis (par un massim di 30 personis) si cjatarà aes 9.30 al parc dal Çoncolan. Chi a saran furnidis lis indicazions ai partecipants su cuâi precauzions cjapâ e su cemût lâ sù in malghe cu lis vacjis, intal rispiet mutuâl. Si partirà aes 10 dal parc par rivâ ae malghe ator des 12.30. Il secont grup, che nol larà daûr in maniere direte des vacjis (ancje chi, un massim 30 personis), al pues cjatâsi aes 12.30 daurman in malghe, cuant che al sarà rivât il grup de transumance. Malghe Pozof e organizarà il gustâ: speck e formadis di produzion proprie, lâts daûr di une paste. A acompagnâ lis mangjativis, lis biris de fabriche di bire Chazil, che a saran presentadis dilunc de zornade (La cuote par cerçâ il gustâ alpin e je di 15 euros a persone). No dome plasês, ma ancje “dovês” inte zornade in mont: aes 15, par ducj al sarà l'“oblic” di dâ une man pai lavôrs in malghe e dopo pe molte, previodude plui o mancul pes 17.30. Il percors: dal plaçâl Çoncolan, rivant di Sudri, si passarà un disnivel sui 400 metris par plui o mancul 2 oris e mieç di cjamin. La tornade: ognidun par so cont. Racomandât un vistiari par escursions in mont. Info: slowfriuli@gmail.com.
NIMIS
Il meracul di Cana devandaûr
A Nimis, graziis al vin de solidarietât "Din un tai ae sêt", tirâts sù squasit 12mil euros a pro dal missionari furlan in Afriche Dario Laurencig. Plui di sîscent personis, cjapâts dentri plui di 100 fruts. Cuatri cuintâi di polente (preparâts da Polentars di Braulins), dîs cuintâi di lens par cusinâ une colossâl cuete in gridele (200 chilograms tra cueste, luianie e poleç), 150 pizis, 500 porzions di pastesute “alpine” preparade dal grup ANA di Tresesin, cuatri persuts di Sauris IGP “firmâts” Wolf, sîs piecis di formadi, doi grups musicâi: i Splumats e i “T Bread”. A son chescj i numars de fieste che e à fat di curnîs sabide ai 17 di Mai a Nimis al imbutiliament dal vin di “Din un tai ae sêt”, une iniziative di solidarietât che e racuei fonts a poie di un missionari furlan, Dario Laurencig, impegnât di cuarante agns in Afriche.  L'avigniment al è puartât indenant dal 2007 di un grup di enolics. Ancje chest an i vins realizâts a son stâts doi, un blanc e un ros, otignûts metint dongje il vin ufiert dai cuindis enolics (che si son zontâts altris produtôrs furlans). A son stadis confezionadis 3.500 butiliis e 400 magnum. A cost zero, parcè che di là de materie prime, dute il necessari al ven ufiert di gjenerôs supporters: butiliis, stropui, capsulis, eticutis, scjatis, cassetis e fintremai il confezionament, fat ancje chest an de unitât mobile di imbutiliament dal centri di riferiment enologjic di Giuseppe Lipari. Tra ufiertis pal gustâ, par puartâ a cjase cualchi butilie, lis maiutis e il libri di “Din un tai ae sêt”, a son stâts tirâts sù cuasi 12 mil euros, passant cussì il record dal 2013. Cun mancul di 10 mil euros al è pussibil fâ un poç in Afriche e “dâ un tai” ae sêt, risolvi il probleme vitâl de aghe potabile par dut une vile. Dal 2007 al 2013, la iniziative, definide “meracul di Cana devandaûr” (parcè che al trasforme il vin in aghe par cui no'nd'à), al à permetût di inviâ a Laurencig, che al opere inte regjon kenyane dal Turkana e intal Sud Sudan, plui di 200 mil euros, che cun chei a son stâts fats une ventine di poçs. Un risultât significatîf, ma minuscul in ogni câs se si pense che il missionari furlan inte sô vite al à fats plui di 400. Tra enogastronomie, musiche e divertiment, nol podeve mancjâ il cjanton de art: il scultôr Tiziano Di Giusto al à intaiât intun bloc di laris il logo de iniziative, “Un rap di Afriche”. La sculture e sarà protagoniste di une aste benefiche, simpri a benefici di fradi Dario. Par informazions su cemût cjatâ lis butiliis e partecipâ cussì ae iniziative di solidarietât: www.diamountaglioallasete.org
VILECJAZE
Premi nazionâl pal agriturisim Ai Colonos
Grande fieste in famee par Benigno Rossi, Paola Moreale e i fîs Elie e Davide, che la lôr aziende agricule biologjiche, cun sede a Vilecjaze di Listize, si è adiudicade il tierç premi pal prodot agroalimentâr de panzete al concors nazionâl par produtôrs di grassinis biologjichis. La iniziative e je stade organizade de Academia Judices Salatii cun sede a Reggio Emilie e la consegne dal premi e je sucedude dilunc di une serade di gale che si è tignude dongje la cantine Albinea di Canâi. 
Di sîs agns la aziende Rossi e gjestìs un arlevament di suins cun alimentazion e trasformazion biologjiche, e dongje l'agriturisim Ai Colonos al à otignût simpri un alt gradiment de bande de clientele e dai esperts dal setôr pe ecelence di dute une largje game di grassinis, che al va dal persut al salam fresc, de sopresse al socol, ducj prodots che a son disponibii dongje la buteghe aziendâl dai Colonos.
UDIN
A Udin une aree verde par Paolo De Rocco
Titulade al architet furlan, un dai prins professioniscj in Italie a cjapâsi in mût aprofondît dal teme dal abatiment des barieris architetonichis. Plantât un arbul in ricuart di Tin Chiandetti “No son lis personis a jessi disabii, al è l'ambient che nus cengle a creâ la disabilitât. Al è un dai messaçs fondamentâi che nus àn lassât lis dôs personis che vuê o visìn e che chê ereditât e dimostre la ricjece straordenarie e la vitalitât de nestre comunitât”. Al è cun chestis peraulis che il sindic di Udin, Furio Honsell, al à strucât il sens de cerimonie organizade dal Comun e de Union taliane lote ae distrofie muscolâr (Uildm) onlus che si è fate ai prins di Jugn inte aree verde di vie Derna a Udin par celebrâ la intitulazion di chest spazi citadin al architet furlan Paulo De Rocco, un dai prins professioniscj in Italie a cjapâsi in mût aprofondît dal teme dal abatiment des barieris architetonichis e de progjetazion acessibile L'avigniment al è stât ancje ocasion par visâsi di Tino Chiandetti, president par vincj agns de Uildm di Udin e figure di prin plan dal volontariât regjonâl, mancjât ai 19 di Avrîl, che in sô memorie, cu la colaborazion dai arlêfs de scuele primarie San Domenico, che a àn partecipât ancje a une “lezion” sul teme de acessibilitât, al è stât plantât inte stesse aree verde un melessâr. 
Sore l'architet De Rocco e, a distre, Tino Chiandetti. Sot, il moment de "lezion" ai fruts.
Di là di un centenâr di personis a àn assistût ai diviers moments de cerimonie che e à viodût ancje la premiazion des studentis dal Liceu Artistic Sello Giada Cantarutti, Megan Ali e Giulia Rossi, che a àn vinçût e otignût une segnalazion intal ambit dal concors di ideis pe realizazion di un panel informatîf su la opare dal architet De Rocco, che al è stât colocât inte aree verde (ducj i lavôrs dai students si puedin viodi su www.uildmudine.org).
PALUCE
Ven cun nô tal zardin evolutîf
I fantats de Alte Val Bût a proponin une interessante mostre didatiche Pai fantats de Val Bût che a frecuentin la Scuele secondarie di Paluce la Biodiversitât no je plui un misteri e nancje che i principis ispiradôrs de “Rêt Nature 2000”, che e protêç e e valorize une part significative dai teritoris comunâi di Çurçuvint, Liussûl, Paluce, Ravasclêt e Trep di Cjargne. Lis scuviertis e cognossincis dai students cjargnei a son presentadis inte mostre didatiche “Naturalmente Friûl: piçul ma grant” e intal “Zardin evolutîf”, fat intal curtîl de scuele in graciis de colaborazion dal “Cesfam” di Paluce. La mostre, traviers tescj, ilustrazions e modelins, e fâs viodi cetant che i fantats a àn imparât sui ambients naturâi de regjon, su la sô ricjece straordenarie di biodiversitât e su la rêt europeane “Nature 2000”. La mostre e podarà jessi visitade fin ai 14 di Jugn, dilunc dai oraris di viertidure dal istitût scolastic. Il “Zardin evolutîf” al è un imprest preziôs di osservazion e cognossince des componentis vegjetâls. Al è stât fat plantant essencis particolârs che a testemonein la evoluzion progressive des plantis, des speciis plui semplicis a chês plui complessis. Doprant plantis za esistentis e altris procuradis in maniere zentîl e implantadis dal dotôr Mario Di Gallo dal “Cesfam” (che al à colaborât ancje ae corezion dai tescj), il “Zardin evolutîf” di Paluce al fâs passâ ai visitadôrs i cambiaments principâi, dai musclis ai felets, des gjimnospermis aes angiospermis. Il percors si disvoluçe in 7 tapis, che a sotlinein lis principâls novitâts evolutivis e il periodi gjeologjic là che si son verificadis.
Info:0433 775144
TOMBE
A rinassin i Bens coletîfs di Tombe I Frazioniscj a àn plantât 580 plantis ator dai lôr cjamps. Pe ocasion 16 arbui a son stâts dedicâts ai gnûfs nassûts dal Comun di Merêt  Cinc cent otante plantutis, sieltis pulît fra lis essencis tipichis dai boscs di planure, a impreziosissin la Proprietât coletive de Comunitât di Tombe. I Frazioniscj a àn lavorât a fuarte dute une zornade par plantâi dut intor ai lôr cjamps (pôc plui di doi etars) e par preparâ une curnîs splendide ae cerimonie anuâl dal implant di un gnûf arbul par ogni gnûf nassût dal Comun di Merêt intal an in cors. Cuasi ducj i 16 fruts celebrâts a àn partecipât cu lis lôr fameis ae fieste, che e à cjapât la vie cui zûcs e lis animazions proponudis da volontaris dal “Pag” (Progjet agregazion zovine), intalât che al cengle la gleseute votive di Sant Roc. Il plevan, pre Zuan Boz, al à clamât la benedizion celeste su piçui, gjenitôrs e volontaris, in plui che su lis campagnis ator, intant che Deniso Nicoletti al à fat i onôrs di cjase a non dal Comun, graciant in maniere calorose lis mamis de Scuele de Infanzie di Tombe cu lis insegnantis, i volontaris e, in mût speciâl, il Grup “Ana” di Merêt, che al à ufiert a ducj i partecipants une pastesute sauride. In bande di Nicoletti, al jere ancje Bogdan Macovei, il di cutuardis agns sindic dal Consei comunâl dai fantats, che al à rapresentât lis zovinis gjenerazions di Merêt di Tombe. Cussì tant che inte comunitât Dongje di Sant Marc (rapresentade dal president dal Comitât frazionâl, Paola Fabello, e dai conseîrs Massimo Moretuzzo e Andrea Uliana), ancje a Tombe, il riordin fondiari resint al à favorît la riscuvierte des antighis Proprietâts coletivis e al à dismovût une rinovade sensibilitât su la oportunitât di une gjestion moderne e partecipade di cheste ereditât preziose, storiche e economiche, semenade in dut il teritori regjonâl, des Alps al mâr. Di mês, al è ae opare un grup intraprendent di volontaris – nomenâts fra i Frazioniscj proprietaris e vuidât di Marco Bernardis –, che si propon di passâ dutis lis dificoltâts metudis di mieç de legjislazion statâl e de complicade burocrazie regjonâl ae costituzion di un orghin eficient di autogjestion pe prudelance e la valorizazion dal patrimoni comunitari di Tombe.
TUALIS
A Tualiis e torne a vierzi la Ostarie cun cusine. Si clamarà “Al Crostis”
La ex scuele materne di Tualiis di Comegliàns e torne a ospitâ une ativitât comerciâl dopo cualchi an di sierade. E je la Ostarie cun cusine “Al Crostis”, che domenie al 1n Jugn cuntune inaugurazion gaudiose e à viert lis sôs puartis al servizi de piçule comunitât cjargnele e dai siei ospits. La Aministrazion bens, che e gjestìs lis proprietâts coletivis dai frazionisti di Tualiis e Naiarêt, e à deliberât di rimeti il so fabricât a Diana Rupil e Giuditta Di Piazza, sotlineant la impuartance di “podê di gnûf dotâ il paîs di un pont di cjatade e agregazion pe comunitât e di une ufierte gastronomiche tipiche pes personis ospits”.Il locâl, in passât gjestît de famee di Tarcisia e Alexander De Marchi, al jere sierât dal 2009. “I 'bens' di Tualiis e Naiarêt – al à declarât sul avigniment il president de proprietât coletive di dirit public, Michele Gracco – a aministrin i propris boscs, aes clevis de mont Crostis, e i edificis costruîts cu lis jentradis de ativitât forestâl, cussients di vê vût in consegne un patrimoni che al va gjestît e, se pussibil, miorât”. La ufierte de Ostarie cun cusine “Al Crostis” e va a metisi inte rêt dai servizis curâts publics e turistics, in Cjanâl di Guart, des Proprietâts coletivis dal cjanâl che, ancje in graciis des jentradis che a divegnin de ativitât selvicolturale, a gjestissin malghis e agriturisims (Tualiis e Culine), buteghis di prossimitât e cjasis par feriis (Pesariis) e ancje il ripâr alpin Tolazzi, aes clevis de mont Cogliàns. |
TRAVÊS
 La poesie e maride la piture
Diverse Trame, chest il titul di une serade organizade dal Consorzi des Pro Loco dal spilimberghês par sabide ai 25 di Otubar, cun inizi aes 17 e 30 li de vile conts Toppo Wasserman a Travês. Si tache cuntune serie di leturis poetichis: 60 viers, la lenghe dal cûr. Chescj i poetes partecipants: Luigina Lorenzini (friulano asìno), Elisa Mattiussi (talian), Maurizio Mattiuzza (basse valsugane), Viviana Mattiussi (furlan di Pantianins), Alessandra Pecman (muiesan moderni), Ilvana Paletti (resiano) Patrizia Pizzolongo (talian), Fernanda Plozzer (alt todesc di Sauris), Marta Roldan (spagnûl), Irene Urli (furlan di Rivolt). E presente Viviana Mattiussi. Improvisazions musicâls di Diego Todesco. Vôs: Vanessa di Bortolo.
Dilunc de serade, il President dal Comitât regjonal de Union des Pro Loco al consegnarà a Fernando Gerometta un ricognossiment pal secont premi cjapât tal Concors Leterari Nazionâl Unpli "Salve la tô lenghe locâl". Ae fin une cjalade ai travuarts rivat dai poetes de Val dal Arzin.Si va indevant cu la scree de mostre di art "Diverse trame" li che a esponin Luca Zaro, Silvia Braida, Plinio Missana e Fernando Gerometta.La mostre e restarà vierte di sabide ai 25 di Otubar fin a domenie ai 30 di NOvembar. Oraris. Martars, miercus e vinar des 9 aes 12. Joibe, 14,30 – 18,Sabide, 9 -12 e 15 – 18,30. Domenie, 10 – 12 e 14,30 – 18.
CODROIP
Serade archeologje
Il circul culturâl La Tribune, cul patrocini dal Comun di Codroip, cu la colaborazion dal Museu Archeologjic di Codroip, e cul contribût de Bancje di Credit Cooperatîf di Basilian, al organize par vinars ai 24 di Otubar, aes 18, li de Sale Cunvignis de Bancje un incuintri public sul teme: I fiers dal mistîr, Struments di lavôr di epoche romane rinvignûts intal nestri teritori. Relazions: Costanza Brancolini, Alex Giacomini, Tiziana Cividini.. Al larà daûr un ghiringhel.
RESIUTE
Sui lûcs de grande vuere, ultime cjaminade
Domenie ai 26 di Otubar ultime escursion de stagjon sui lûcs de Prime Vuere Mondiâl in Val Resie. Si larà sul Mont Staulizze e a Resiute, tornant a lei "sul cjamp" lis fasis finâls de Bataie de Val Resie. Partence: oris 9:30 a.m. Place de frazion di Sant Zorç (dongje la Glesie) - Comun di Resie. Itinerari: Sant Zorç - Stai Ruschis - Mont Staulizze - Postazions cuintriaeriis cuote 757 - Trinceraments Mont Chichi - Cimitieri militâr gjermanic di Resiute. Tornade a Sant Zorç: cun furgoncin mes a disposizion dal Comun di Resie. Dificoltât: escursion cence dificoltât, al covente un alenament discret; disnivel in rive sù: 500 metris plui o mancul; lungjece: 8 km plui o mancul; necessaris vistiari e cjalçaduris di trekking; puartâ cun se gustâ al sac e adeguât cuantitatîf di aghe di bevi. Timp di percorince: oris 6:00 plui o mancul, fermadis tematichis e gustâ al sac cjapâts dentri. Acompagnadôr storic: dr. Marco Passoni. Partecipazion libare.
In câs di brut timp,la escursion e sarà rimandade a altre date. INFO: cel. 347 3059719 - e-mail marco_pascoli@alice.it
TARCINT
Albino Lucatello a Palaç Frangipane
L'assessorât ae culture e la biblioteche Civiche di Tarcint, intune cul Centri iniziativis culturai di Tarcint, a invidin ae scree de mostre “Pensiero/pittura” dedicade al pitôr Albino Lucatello, tai 30 agns de muart. La scree e sarà aes 18 di sabide 18 di Otubar a Tarcint, Palaç Frangipane.
La mostre, che e je stade pussibil ancje in graciis de poie di Friulprint di Cuelalt di Tarcint, si podarà visitâle fin ai 6 di Zenâr dal 2015, in ducj i fins setemane. Oraris: vinars des 17 aes 20; sabide e domenie des 10 aes 13 e des 16 aes 20.
________________________________
BUIE
Un lunari di apontaments
Joibe ai 16 di Otubar, te sale de Biblioteche comunâl, in place Marcjât a Buie, aes 20.30: Friûl 1914-15, la vuere prime de vuere.. Il torna fuarçât dai emigrants”. Incuintri cul professôr Matteo Ermacora, de universitât Ca’ Foscari di Vignesie.
Vinars ai 24 di Otubar a 20.30 te Biblioteche comunâ di San Stiefin a Buie: “La val Albe tra nature e storie”, par cure dal Cai di Buie.
Joibe ai 30 di Otubar, tal teatri de Cjase de zoventût di San Stiefin aes 20.30: Dople cjalade su la Grande vuere- Tra cine, vuere e propagande. Proiezion dal documentari storic de Cineteche dal Friûl, cul coment dal prof. Lucio Fabi, storic, regjist e consulent museâl.
Vinars ai 7 di Novembar, tal teatri de Cjase de zoventût di San Stiefin, aes 20.15: Ocjo vivi e lavorâ cence fâsi mâl”. Testemoneance di Flavio Frigè; monolic di Bruzio Bisignano e, pe prime volte a Buie, i Trigeminus in: 626 ... sigurece sul lavôr: ridinji sore ma pensinji.
Info: www.eltomat.it
TAIPANE
Fieste in grote
Ai 6 di Otubar al cole l'aniversari dai 160 agns de nassite di Carlo Seppenhofer. Par visâsi cheste date ma soredut par vê la ocasion di stâ intun, il Centri Ricercjis Cjarsulinis "C. Seppenhofer" al organize ancje chest an l'incuintri "SPELEOTROVIAMOCI2014", che al varà lûc al 1 di Novembar dongje il ripâr speleologjic di Taipane.
Program. Sabide al 1 di Novembar,si cjatisi aes oris 14 a cjapâ puest par durmî. Des oris 18, in Sale grande, cines, foto e coments. Aes 20 spaghetade, des oris 21 incà proiezions libaris in base il numar dai filmâts, PPT, e cetant altri metût a disposizion in libertât dai partecipants. Al va daûr fieste e musiche cetant che al baste. In Sale Segretarie discors seris, sul futûr de speleologjie universâl, fats tra une tace di ros e uno di blanc. Materiis primis (vin, sgnapis e licôrs varis) a son a cjame dai partecipants: in dut câs se nol rive nuie o cjatarês za sul puest cetant che al baste par sorevivi. No son previodudis escursions in grote salf matetâts personâls o eventuâls prestazions individuâls, purpûr si puedin fâ jessudis speleo in noturne o diurne su la base de disponibilitât dai partecipants (grote di definî su la base dal nivel alcolic). Cuote di partecipazion euros 5 a persone. La pastesute e lis bevandis a son metudis inte cuote di partecipazion, in dut câs a son acetadis ben libaris donazions in nature (vin e sgnapis).
Info: seppenhofer@libero.it
BORDAN
Fruts, ducj in biblioteche a Bordan!
Ancje chest an, o spietìn i fruts des scuelis maternis e di chês elementârs li de Biblioteche Comunâl “Ugo Rossi” di Bordan par tantis bielis leturis animadis in lenghe furlane e taliane. Ae fin des leturis, si fasarà mirinde ducj insieme. Nus fasarà une vore plasê la presince e la colaborazion dai gjenitôrs. I incuintris a tacaran tor lis 16.30, e a finiran tor lis 17.45-18.00. I fruts a podaran rivâ in sigurece li de biblioteche midiant dal “Pedibus”, vâl a dî a pît, compagnâts di adults, partint di difûr des scuelis elementârs aes 16.20. Prossim apontament de gnove stagjon di leturis: VINARS ai 24 di Otubar: Presentazion de racuelte di contis cun CD MARIFLABIS, Storiis in marilenghe di lei e di scoltâ. In regâl, Mariflabis par ducj i frutins presints! Cjârs gjenitôrs: o spietìn vulintîr tortutis, dolçuts e bibitis pe mirinde! | |
|
Nessun commento:
Posta un commento